Sicu cetantis vals dal Aalt Friûl ancje chê da l‘ Aupe a Mueç al é segnade da la erosion. Crets, gravons, ruvîs ai caraterizin l‘ambient, rare une cueste che no la cori il pericul di slacâ. Gjenerazions di contadins a an pierdût la batae cuintri da la fuarce di gravitât, dome cualchidun al ten dûr par fermâ il vegni manco dal vieri paesaç culturâl. Ancje pa la int di Dordole, sacor il borc pui vivarous e biel da la val, nol é gnouf il sintiment di dispossence.

Pa la cuâl al ven naturâl in chest puest vê iniments il re grec Sysiphos e riclamâ al presint il mît classic. UNIKUM lu a fat in forme di opare che la vegnará imbasdide dut un cul TEATR TROTAMORA e ZORA sot da la regje di Marjan Štikar. I zovins autôrs carintians Elena Messner e Dominik Srienc a son stâts incjariâts di scrivi il libret che al disegne Sysiphos tant che personaç eroic feminin e cetant contraditori di non Sisifa (par furlan si pues tradusilu in: SI! FASIN!): »Une che si rivôlte cuintri chel che chei atris si fasin bastâ e par cheste rason la ven cjastiade. Par il paîs jei al é tal stes moment une disgracie e une benedizion...« Pont di partence da la storie al é un (quasi reâl) progjet politic par riorganizâ di plante fûr la zone, progjet che nol lassarés nissun clap al so puest e che al menarés la int a socombi.

SISIFA — L‘ANTEPRIME la vûl jessi la overture a la rapresentazion da la opare SI, SI FA proviodude ta vierte dal 2017 e al é prontade tant che un teatri plurilengâl in pui stazions, a Dordole e torator. A vegnaran rapresentadis li storiis e li condizions di vite da la zone ma ancje i tentatîfs, sepur tra tantis contrarietâts, di trasformâ il paîs intun puest da la utopie. Li senis no dan dome une cjerce dai dialics e da li cjançons da la opare ma a dan ancje la idee dal gjenar di lavôr che al fâs il grop TROTAMORA: nassût di une associazion culturâl slovene pui che centenarie al é une colaborazion jenfri atôrs e atoris professioniscj e amatoriâi, dedicât a un teatri popolâr contemporanei che al cjape posizion politiche e al intint la sô art tant che at coletîf di solidarietât.